Paplajahan 8: Indik Ngutus Anak mangda Midartayang Orti Rahayune ring Wawidangan sane Lianan
Para Utusan 13:1-12
Ring Kota Yerusalem para pengiring Sang Hyang Yesuse akeh nerima sengsara krana katungkasin olih anake sane nulak pengajahan ipune. Yadiastun sekadi punika, sabdan Sang Hyang Pengardi kawartayang maideh-idehan ngawit saking Yerusalem kantos negara-negara sane lianan. Kenten pada wenten pasamuan pengiring Sang Hyang Yesus sane kawangun ring Kota Antiokia.
8
Duk punika ring pasamuan para krama druen Sang Hyang Yesuse sane ring Kota Antiokia, wenten para anak lanang sane dados sinoman Sang Hyang Pengardi. Ipun pada ngicen pengajah-ajahan indik Sang Hyang Yesus. Anake punika nenten tios, dane Barnabas, dane Simeon sane taler kasambat Selem, dane Lukius saking Kota Kirene, dane Saulus, tur dane Menahem sane saking alit kaangkat dados semeton raja Herodes Antipas. 2 Ritatkala para krama druen Sang Hyang Yesus ngaturang bakti tur mapuasa, irika raris Roh Sang Hyang Pengardi masabda ring ipun makasami sapuniki, “Pilih ja Barnabas lan Saulus apanga ia ajak dadua nglaksanayang ayah-ayahan ane suba tetepang Nira.”3 Sasampune wusan mapuasa lan mabakti, raris ipun ngenahang tangannyane ring dane Barnabas sareng dane Saulus pinaka tanda ipun kaserahang ring Sang Hyang Pengardi lan kautus mangda midartayang Orti Rahayu indik Sang Hyang Yesus.
4 Sasampune kenten, dane Barnabas sareng dane Saulus luas nuju Kota Seleukia krana dane kautus olih Roh Sang Hyang Pengardi. Saking kotane punika dane sareng kalih malayar nuju Pulo Siprus. 5 Sasampune dane sareng kalih rauh ring Kota Salamis ring Pulo Siprus punika, dane midartayang pengajahan saking Sang Hyang Pengardi ring bale-bale wantilan agama Yahudine. Dane makakalih kasarengin olih I Yohanes Markus mangda nulungin dane sareng kalih.
6 Dane makatiga luas ngiterin saluirin pulone punika ngantos ka Kota Papos. Irika kabenengan ipun sami matemu sareng anak Yahudi sane mapesengan Baryesus yening ring basa Yunani mapesengan Elimas. I Elimas puniki tukang sihir sane ngaku-ngaku dados sinoman Sang Hyang Pengardi. 7 Tukang sihire punika masawitra sareng gubernur irika sane mapesengan Sergius Paulus. Gubernure puniki anak sane wikan lan wicaksana. Raris gubernure punika ngamanggil dane Barnabas sareng dane Saulus mangda tangkil, krana sang gubernure punika meled mirengin pengajahan saking Sang Hyang Pengardi. 8 Nanging tukang sihire punika ngutsahayang nungkasin pengajahan dane Barnabas sareng dane Saulus mangda gubernure nenten pracaya ring Sang Hyang Yesus. 9 Dane Saulus sane taler kasambat Paulus, kaebekin olih Roh Sang Hyang Pengardi. Irika dane nlektekin tukang sihire punika. 10 Raris dane Paulus mabaos sapuniki, “Wih tukang bobab! Ragane buka ratun para setan krana ragane nglawan paundukan ane patut! Ngudake ragane tusing suud-suud ngipekang margi sane patut saking Sang Hyang Tunggal tur ngranayang anake inguh paling? 11 Nah jani, tolih ja! Sang Hyang Tunggal jagi ngukum ragane. Ragane bakal buta, tur tusing nyidang ningalin sinar matan aine kanti dinane ane kapastiang Ida.” Jeg pramangkin tukang sihire punika ngrasayang peningalannyane kalingkubin sayong tur peteng dedet kantos magabag-gabagan ngrereh anak mangda nuntun ipun. 12 Ritatkala gubernure nyaksiang paindikane punika, dane pracaya ring Sang Hyang Yesus krana dane angob pisan indik pengajahan Sang Hyang Yesuse.
Penuntun mabligbagan ring pasamuan
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii. “Sekadi napike sapatutne iraga nyalanang idup manut pengajahane puniki?"
iv. “Kapining sirake sapatutne iraga nyeritayang malih ceritane puniki?”